Ճիշտ թխելու խորհուրդներ Թխուկից

Ասում են՝ խոհարարությունը արվեստ է, իսկ ճիշտ թխելը՝ վարպետություն։ Այստեղ որոշ ճշմարտություն կա․ խոհարարության մեջ քեզ պետք են տեխնիկական հմտություններ, իսկ թխելուց` ստեղծագործ միտք։ Բայց եկեք նայենք մյուս կողմից․ խոհարարության մեջ դուք ստեղծում եք ճաշատեսակ՝ ավելացնելով ձեր ոճը, իսկ ճիշտ թխելու համար անհրաժեշտ է հաշվի առնել որոշ մանրուքներ․ հետևել բաղադրատոմսին, ճիշտ հաշվարկել ժամանակը և այլն, եթե իհարկե չեք ցանկանում ունենալ վառված տորթ և չստացված կարկանդակ․․․
Այդ պատճառով մենք որոշեցինք այս անգամ ներկայացնել մի քանի պարզ կանոններ, որոնք կօգնեն ունենալ ստացված թխուկներ․

• Ճիշտ չափել

Սա խորհուրդներից ամենակարևորն է։ Ճիշտ չափելու համար ավելի լավ կլինի խոհանոցում ունենալ թվային կշեռք հենց նման դեպքերի համար, իսկ եթե չունեք, ապա չոր բաղադրիչները (օրինակ ալյուրը) չափեք գդալով և բաժակով, հեղուկ բաղադրիչները՝ թափանցիկ բաժակով, որի վրա նշված են չափման միավորները։

• Օգտագործել լավ հարիչ

Մի՛ խնայեք գումարը լավ հարիչի համար, հավատացեք այն ձեզ երկար կծառայի և կօգնի լավ արդյունք ստանալ։
 

• Օգտագործել սենյակային ջերմաստիճանի բաղադրչիներ

Եթե բաղադրատոմսի մեջ նշված է սենյակային ջերմաստիճանի բաղադրիչներ, ապա պետք չէ օգտագործել սառնարանից հանված սառը կարագը  կամ ձուն։ Մեկ գիշեր թողեք նշված բաղադրիչները խոհանոցի սեղանին, ապա օգտագործեք առավոտյան՝ ըստ բաղադրատոմսի։

• Ստուգել ջեռոցի ջերմաստիճանը

Լավ գաղափար է, որ հաճախ ստուգեք ջեռոցի ջերմաստիճանը՝ համոզվելու համար, որ այն ճշգրիտ է։ Երբ արդեն թխում եք փորձեք չբացել ջեռոցի դուռը, մինչև նախատեսված ժամանակի ավարտը, քանի որ բացելուն պես սառը օդը կընդհատի թխելու գործընթացը։

• Չօգտագործել փոխարինիչներ

Ցավոք, ալյուրի, շաքարավազի կամ կարագի համար լավ փոխարինիչներ չկան։ Խոհարարներն ասում են՝ թխելը քիմիա է․ ռիսկային փորձ, այնպես որ կարող եք փոխարինել կամ ավելացնել այնպիսի բաղադրիչներ, որոնք չեն փոխի բաղադրատոմսի հիմնական մասը։

• Պատրաստել թխելու ամանները

Այն ամանը, որի մեջ նախատեսում եք թխել պետք է լինի հարմար և համապատասխան տարողունակությամբ։ Կարող եք օգտագործել խոհանոցային թղթերը՝ նախատեսված հենց թխելու համար, դրանց շնորհիվ հեշտ կլինի հեռացնել թխվածքը ամանից և մաքրել։ Իսկ եթե չեք օգտագործում այս թղթերից, ապա քսեք չկպչող սփրեյ, հետո ավելացրեք խմորային զանգվածը։

Դե ինչ, հուսով ենք այս խորհուրդները կօգնեն ավելի լավ թխվածքներ ստանալ և վայելել, իսկ եթե հանկարծ չստացվի չհուսահատվեք՝  Թխուկը միշտ պատրաստ է օգնել: